ሓበን ትግራይ

ሓበን ትግራይ ካብ ወርሒ ሕዳር 2013 ዓ.ም. ጀሚሩ ኣብ ህዝቢ ትግራይ ዝበጽሕ ብዘሎ ከቢድ ዂናት ንዝተጎድኡን ካብ ናብራኦም ዝተመዛበሉን ወገናት ረድኤት ንምሃብ ዝተጣየሸ ማሕበር እዩ። ነዚ ዕላማ ንምስኻዕ ድማ ካብ ኣባላት እቲ ማሕበር ካብ ዝርከብ ማሃያ ብተወሳኺ ካብ ግብረ-ሰናይ ውልቅሰባትን ውድባትን ዝልገስ ገንዘብን ካልኦት ናውቲን የተኣኻኻብ፤ ካብ መሸጣ አቁሑትን ተወሳኺ እቶት ንምርካብውን ይጽዕር። ካብ ዝኾነ ምንቅስቓስ እዚ ማሕበር ዝርከብ ኩሉ ምሉእ ብምሉእ እቱ ማሕበር ንዝተመስረተሉ ዕላማ ጥራህ ይውዕል።

ኣብ ትግራይ ዓድና ዝበፀሐን ዝበጽሕ ዘሎን ናይ ህዝቢ ሞት፣ ምፍንቓልን ናይ ንብረት ምብራስን ኣገዲሱና ዓቕሚ ብዝፈቐደ ልምሕጋዝ ሕድሕድና ዝኸኣልናዮ ገንዘብ ብምውፋይን ንቐጻሊውን ወርሓዊ ክፍሊት ክንወፊ ቃል ብምእታይ ነዚ ናይ ተጋሩ ማሕበር ካብ ሓደ ስድራ ብምጅማር መስሪትና ኣለና። ሓበን ትግራይ ንቶም መጣየሽቲ ይኹን ኣብ መጻኢ ኣባላት እዚ ማህበር ንዝኾኑ ካብ ቕሳነት ሕልና ዝሓለፈ ዝኸፍሎ ማሃያውን የለን።

ካብ ገንዘብን ካልኦት ናውቲን ምትእኽኻብ ብተወሳኺ ውሉዳትና ኣብ ዝተፈላለዩ በዓላት ካብዝረኽብዎ ውህብቶታት ንዚ ዕላማ ንኸወፍዩ ብምትብባዕ ንሳቶምውን ንትግራይ ንኽፈልጡን ብዓቕሞም ክሕግዙን ብምግባር ተገዳስነትን ንዝተጸገመ ናይ ምርዳእ ባህሊ ከማዕብሉ ይሕግዝ ኢልና ንኣምን።

ሓደ ወይኻዓ ውሑዳት ስድራታት ክወፍዩ ዝኽአሉዎ መጠን ምስ’ቱ ኣብ ትግራይ ዓድናን ህዝብናን ዝበጽሕ ዘሎ ኣሰካፊ ኹነታት ኣንጻር ካብቱ ዝድለን ድልየትናን ኣዝዩ ትሑት እዩ። ዝጠፍእ ህይወት ንጹሃን፣ ዝበጽሕ መከራ፣ ዕንወት ትካላት፣ ሃፍትን መሬትን ኣዚዩ ዝለዓለ ኢዩ። ስለዚ ድማ ኩሉ ትግራዋይ ካብ ዝሓለፈ ዝያዳ ብዝለዓለ ብዝካኣሎ ዓቕሙ ኣዋዲዱ ንወገናቱን ዓዱን ካብዚ ጸበባ ንምውጻአ ንኽረባረብ ንላቦ።

ኣብ ቐረባ እዋን ኣዚ ማሕበር ንኹሉ ትግራዋይ ብኣባልነት ምቕባል ከምዝጅምር’ውን ክንሕብር ንፈቱ። እዚ ማሕበር ምሉእ ግልጽነት ብዝተላበሰ ኣግባብ ንትግራይ ዝሰርሕ ማሕበር ተጋሩ እንትኸውን ካልኦት ተመሳሳሊ ዕላማ ምስዘለዎም ውድባት፣ ማሕበራትን ውልቀሰባትን ንምስራሕ ቕሩብ ምዃኑ ንሕብር።

ሓበን ትግራይ